បាត់ដំបង៖ ជឿជាក់ថា បងប្អូនប្រជាជនខ្មែរប្រាកដជាចាំបាននៅយុវជនខ្មែរម្នាក់ដែលធ្លាប់ប្រកាសពីភាពជោគជ័យក្នុងការស្រាវជ្រាវ និងចងក្រងរូបមន្តផលិតមីពីផ្លែល្ពៅ កាលពីឆ្នាំ២០១៩ និងទទួលបានការសាទរខ្លាំងពីមជ្ឈដ្ឋានមហាជន ព្រមទាំងទទួលបានការគាំទ្រជាហូរហែរ។ ទន្ទឹមនឹងជោគជ័យនេះ ក្រោយមកក៏មានដំណឹងពីការចង់បោះទុនចូលរួមវិនិយោគផលិតពីល្ពៅនេះពីសំណាក់អ្នកមានទ្រព្យធនគួរសមមួយរូបនៅកម្ពុជា ប៉ុន្តែត្រូវបានស្ថាបនិកមីល្ពៅបាត់ដំបងខាងលើប្រកាសបដិសេធ។

យុវជនដែលបានរកឃើញរូបមន្តផលិតមីល្ពៅខ្មែរខាងលើនេះមានឈ្មោះថា វ៉ាន់ គិមវ៉ាង។ ក្រោយល្បីល្បាញបានមួយរយៈធំ និងស្ងប់ស្ងាត់ទៅវិញ ស្រាប់តែពេលថ្មីៗនេះ ផេកផ្លូវការមីល្ពៅខ្មែរ បាត់ដំបង បានប្រកាសពីការផ្អាកផលិតមីល្ពៅហើយ ព្រមជាមួយសំណេរយ៉ាងវែងអន្លាយមួយបញ្ជាក់អំពីរឿងរ៉ាវនេះ។

នៅលើទំព័រហ្វេសប៊ុក មីល្ពៅខ្មែរ បាត់ដំបង បានសរសេរយ៉ាងដូច្នេះថា៖ “ពេលវេលាពិតជាដើរលឿនណាស់ ខ្ញុំពិតជាសុំទោសដល់បងប្អូនទាំងអស់គ្នាខ្លាំងណាស់ . ដែរខ្ញុំមិនអាចបន្តធ្វើចំណីអាហារដែលជួយសុខភាពបានទៀតទេ ខ្ញុំត្រូវផ្អាកមួយរយៈសិន ហើយក៏មិនច្បាស់ថាថ្ងៃណាត្រឡប់មកវិញដែរ។ ខ្ញុំសូមអរគុណដល់អ៊ុំពូមីងបងប្អូនដែរបានគាំទ្រខ្ញុំរហូតមក ហើយខ្ញុំសុំទោសខ្ញុំមិនអាចជួយកសិករបាន ខ្ញុំមិនអាចបង្កើតរោងចក្របាន ខ្ញុំសុំទោសបងប្អូងទាំងអស់គ្នា រឿងទទួលវិនិយោគកាលមិនពីមុន ពិតជាមិនងាយស្រួយទេបងប្អូន ព្រោះបងប្អូនមួយចំនួនខឹងស្អប់ខ្ញុំព្រោះខ្ញុំមិនទទួលវិនិយោគ តែគ្រប់យ៉ាងគឺវាមានហេតុ និង ផល។”

ជុំវិញសំណេរនេះមហាជនជាច្រើនបានចូលទៅសរសេរនូវ Comment លើកទឹកចិត្ត ព្រមទាំងមានទស្សនៈផ្សេងៗគ្នាអំពីរឿងរ៉ាវនៃការផ្អាកផលិតមីល្ពៅខ្មែរដោយយុវជនរូបនេះ៕